Briksdals bakekit
Så kjekt at du ville kjøpe startsett hjå meg. No er vi i gang, og alt ligg til rette for at du skal lukkast med surdeigsbaksten din.

Steg 1 – mate surdeigen
Ta glaset med surdeigsstartar i og ha oppi 100g økologisk sikta kveitemjøl frå den lille papirposen og 100g kaldt vatn frå springen. Rør saman og sett lokket på løst, ikke skru heilt til då surdeigen kjem til å vokse.

No skal du vente til surdeigen din har vekse seg omtrent dobbel så stor og er full av bobler. Med desse blandingsforholda tek dette 8-10 timar på ein lun stad, medan det tek lengre tid om den står kjølig. For å sjekke om surdeigen er klar til å bake med kan du ta bittelitt over i eit glas med vatn, dersom han flyt er han klar.

 

 Ta 430g kaldt vatn i ein bakebolle, hell oppi 100g surdeigsstartar (la det vere igjen litt i glaset!) og hell oppi heile posen med Briksdal bakeblanding (dette er 600g mjøl til saman). Elt i kjøkenmaskin til deigen har samla seg, dekk til og vent ein time. Du kan heilt fint kna for hand også. 

Steg 2 – sette deig 

Bland saman mel, vatn og surdeig, du kan elte det lett i maskina eller for hand. Dekk til med eit kjøkenhandkle og vent omlag ein time. Tilsett 1 ss salt (eg bruker fint flaksalt, men berre ta det du har heime). Kjør i kjøkenmaskina til saltet er blanda inn, eller kna det inn med våt hand. Dekk til og vent 30-60 min før du strekk og bretter deigen.

Til saman skal deigen få stå på benken i omtrent 3 timar, og i løpet av den tida skal du strekke og brette deigen to til tre gongar. Ha litt vatn på heile handa og ta tak under deigen, løft den opp forsiktig, og rull den rundt handa di.

Dersom du skal på jobb eller har andre planar så passar det kanskje betre å ha deigen ståande lengre. Det er ikkje noko problem – sett ho kjølig så kan ho stå lengre.

 

Steg 3 - forme brødet
Her kan det vere greitt med ei hevekorg, men om du ikkje har kan du nytta eit dørslag, ei sil eller ei form med luftehull.

Når eg formar brød, velter eg deigen ut på rein benk (uten å strø med mjøl) og så strekker eg han litt forsiktig utover før eg bretta han innover seg sjølv. Deretter arbeidar eg med han for at han skal stramme seg opp og få ei glatt overflate. Her kan ei deigskrape vere eit godt reiskap, men ein treng ikkje! Dra deigen mot deg med handflatene og form ein ball, eller oval form om du har oval hevekorg. Strø mjøl på deigen (gjerne rismjøl sidan det ikkje trekker fukta ut), dekk hevekorga med kjøkenhandkle og velt deigen oppi. Pakk kjøkenhandkleet rundt og sett deigen i kjøleskapet over natta, den bør stå minst 12 timar og maks 32 timar til kaldheving. 

 

Steg 4 - steike brødet
Forvarm bakestål eller støpejernsgryte i omnen, om du ikkje har så forvarm omnen med steikebrett inni. Bruk nest nederste rille, på den nederste sett du eit steikebrett som er djupt, eventuelt ei ildfast form. Skru på full guffe og vent ein time. Ha bakepapir eller litt mjøl på ein pizzaspade og velt den kalde deiga over på den. Snitt deigen med eit barberblad eller noko som er skikkeleg skarpt. Her er det berre å vere kreativ, men hugs minst eit djupt kutt der du tenkjer at brødet skal sprekke opp og utvide seg.

Flytt brøddeigen frå pizzaspaden og over på stål eller i gryta, hell ca. 2 dl varmt vatn i forma som står under, skru temperaturen ned til 230 grader og vent i 20 min. No er brødet halvsteikt og du skal ta ut forma med vatn før du steiker vidare i 20 min til. Følg med siste halvdel, det kan hende du må skru ned litt om omnen din er kraftig. Ta ut brødet og la det avkjøle på rist i ein halvtime.

Ta-da! No kan du ete eit sjølvlaga briksdalbrød – eg håpar det smakar fantastisk.

Vegen vidare:
Om dette ga meirsmak så har du no ein surdeigsstartar som kan vare for alltid så lenge du passar på han. Mat han opp med like delar vatn og økologisk mjøl, til dømes 50 gram av kvar. Eg bruker sikta kveite, men du kan mate med grovare meltypar også. Om du tenkjer å bake ofte kan du la surdeigsstartaren stå i romtemperatur og mate kvar dag, då er den bakeklar på eit blunk. Om du er meir ein helgebakar kan du la surdeigen stå i kjøleskapet, då treng den påfyll omlag ein gong i veka.

Har du spørsmål eller tilbakemeldingar før/etter eller undervegs så er det berre å ta kontakt med meg på instagram (@briksdalbaker). Der finn du informasjon om surdeigsstartaren, bakeprosessen steg-for-steg, og oppskrifter på blant anna pizzabotn, naan og pitabrød på surdeig. 

Beste helsing

Anette